《為工作訂一個極高嘅standard》
因為而家好少出街，一出街真係開心大發現，以前覺得理所當然嘅細節都忽略左...
話說尋日出去銅鑼灣，行行下就入左間藥妝店，我就係個啲，明明冇野買，但經過藥妝店都打個白鴿轉嘅人。
本身我就想睇下有咩化妝護膚品，係用左即刻變美女嘅。但我入左呢間鋪之後，我真係俾佢啲「心機」嚇親。每件product 佢都畫張卡介紹返件product，咁可能你會話有咩咁出奇姐，都係promotion 一種，但你會俾佢嘅用心感動。
馬油佢會畫隻馬，hand cream 會畫雙手，但畫功真心唔馬虎，隻手畫到好似釋迦牟尼佛隻手咁好福氣。一支普通精華冇咩特色，佢會畫返個支精華係個卡度。然後愈睇愈amazing，藥妝店變gallery。真係頭盤變主菜，睇睇下已經冇睇賣咩，只係睇邊張卡畫咩。
一個華麗轉身，發現真係成間鋪都有art work。朋友即刻話，呢啲緊係freelance 畫架啦，咁多點畫呀？仲要hand drawing，唔係電腦畫，錯左要re-draw 喎。參觀完一輪，就行去問個職員：
我想問呢，你啲卡畫得咁靚，自己員工畫架？
係呀
吓？即係office 同事畫架？
唔係呀，我地畫架
吓？咁多喎
係呀，我地畫架
吓，真係畫得好出色呀...
多謝多謝
朋友聽到喺度拍手掌。真係高手在民間，呢間公司真係用蔗渣價錢，煮出燒鵝的味道。冇電腦冇freelance冇promoter，小畫家都冇，用盒color pen 去畫。
真係好欣賞啲人，咁用心咁做好一份工，個份心機真係好值得加許，佢係為佢份工訂一個極高嘅standard.....俾啲掌聲佢啦。
~~~~~
你見到一間藥妝店，sell 一件product 都咁有心機。香港特首出來做訪問，引句句子都唔google search 下，做野上心啲啦好心。
Search